Լիբիայի ազգային բանակը՝ ֆելդմարշալ Խալիֆ Հաֆթարի հրամանատարությամբ, վերականգնել է, այսպես կոչված, նավթային մահիկի (Սիրտի ծոցի ափ) շրջանում գրոհայինների գրաված նավահանգիստների վերահսկողությունը: Այս մասին Sky News Arabia հեռուստաալիքին հայտնել է Լիբիայի ԶՈՒ ներկայացուցիչ, բրիգադային գեներալ Ահմեդ ալ Միսմարին, փոխանցում է ՏԱՍՍ-ը:
«Բանակն ամբողջությամբ վերականգնել է նավթային մահիկի շրջանի բոլոր նավահանգիստների վերահսկողությունը, այդ թվում՝ Ռաս-Լանուֆի եւ Էս-Սիդրի»,- ասել է նա:
Մեկ շաբաթ առաջ երկրում խոշորագույն Ռաս-Լանուֆ եւ Էս-Սիդր արտահանման տերմինալները ենթարկվել էին անցյալում դրանք վերահսկող դաշտային հրամանատար Իբրահիմ ալ Ջադրանի կազմավորումների զանգվածային հարձակմանը: Հաղորդվում էր, որ նրանց աջակցել էին «Ալ Քաիդայի» հետ կապված իսլամական «Բենղազիի պաշտպանության բրիգադները» եւ մի շարք արմատական կազմավորումներ Լիբիայի հարավից: Անձամբ ալ Ջադրանն էր տարածված տեսաուղերձում հայտարարել գործողության մեկնարկի մասին, որն ուղղված է «նավթային մահիկի ժողովրդին շահագործումից եւ ճնշումից ազատելուն»: