Երբ չոբանն սկսում է չափից դուրս շատ գոռգոռալ, գյուղի բնակիչները սկսում են նրան չհավատալ: Այսօր՝ հունվարի 25-ին Ադրբեջանին ուղղված նման ակնարկ է արել Կովկասյան ինստիտուտի տնօրեն Ալեքսանդր Իսկանդարյանը, մեկնաբանելով պաշտոնական Բաքվի կողմից անդադար հնչող ռազմատենչ հայտարարությունները:
«Իրականում ոչ ոք պատերազմ չի ուզում, քանի որ դա չի բխում որեւէ կողմի շահերից»,- ասել է Իսկանդարյանը, նկատելով, որ տարածաշրջանում թափ են հավաքում նոր էներգետիկ նախագծերը, եւ այդ ֆոնին քիչ հավանական է, որ որեւէ մեկը թույլ տա ռազմական գործողությունների վերսկսում այդ նախագծերի մոտ:
Անդրադառնալով ԵԱՀԿ Մինսկի խմբի միջնորդական ջանքերին եւ նրա դերին, Իսկանդարյանը նշել է Մինսկի խմբի խնդիրը ոչ թե կողմերին հաշտեցնելն է եւ խնդիրը լուծելը, այլ բանակցային գործընթացին աջակցելը եւ հակամարտության միջազգայնացումն, ի դեմս նույն Ֆրանսիայի, Ռուսաստանի եւ ԱՄՆ-ի:
«Մինսկի խումբը յուրահատուկ ուղի է հակամարտող կողմերի միջեւ: Այսպես, թե այնպես, նրա ջանքերի արդյունքն ակնհայտ է՝ բանակցային գործընթացը շարունակվում է»,- ընդգծել է Կովկասի ինստիտուտի տնօրենը: