ԱՄԷ-ի գործարարները շահագրգռված են ներդրումներով Հայաստանում: Այս մասին հունիսի 21-ին լրագրողների հետ հանդիպման ժամանակ հայտարարեց Արաբական Միացյալ Էմիրությունների (ԱՄԷ) դեսպան Ջասիմ Մուհամմեդ Ալ-Քասիմին:
Նրա խոսքով՝ առաջին հերթին գործարարներին գրավում է կայունությունը, երկրի տնտեսական աճը: ԱՄԷ-ի գործարարները շահագրգռված են առկա ներուժով, մասնավորապես, դա վերաբերում է էներգետիկ ոլորտին, որտեղ կարող են լինել ինչպես ուղիղ ներդրումներ, այնպես էլ՝ այլ ընկերությունների հետ համագործակցությամբ, եւ զբոսաշրջությանը: «Ինչ վերաբերում է կոնկրետ օրինակներին, ապա առեւտրի ոլորտում նման օրինակ է Carrefour սուպերմարկետը»,- ասաց դեսպանը:
Ջասիմ Մուհամմեդ Ալ-Քասիմին շեշտեց, որ թվերը վկայում են տնտեսական հարաբերությունների զարգացման մասին: Եթե 2016 թվականին երկրների միջեւ առեւտրաշրջանառությունը կազմել է 119 մլն դոլար, ապա նախորդ տարի՝ արդեն 240 մլն դոլար:
Զգալիորեն աճել է նաեւ ԱՄԷ-ից զբոսաշրջիկների թիվը. 2013 թվականին Հայաստան այցելել է միայն 403 զբոսաշրջիկ, իսկ անցյալ տարի այս ցուցանիշը կազմել է 8347 մարդ: Դեսպանը նշեց, որ սա, առաջին հերթին, պայմանավորված է ուղիղ չվերթների քանակի ավելացմամբ՝ հավելելով, որ այժմ մեկ շաբաթվա ընթացքում 18 ուղիղ չվերթ է իրականացվում:
