Ռուսաստանը ԱՄՆ-ի եւ Ֆրանսիայի հետ`որպես ԵԱՀԿ Մինսկի խմբի համանախագահ, Բաքվի եւ Երեւանի լիակատար համաձայնությամբ աշխատում է ղարաբաղյան հակամարտության կարգավորման ուղղությամբ: Այս մասին հինգշաբթի ՄԱԿ-ի գլխավոր քարտուղար Անտոնիո Գուտերեշի հետ բանակցություններից հետո հայտարարել է Ռուսաստանի արտգործնախարար Սերգեյ Լավրովը:
Պատասխանելով ադրբեջանցի լրագրողի՝ ՄԱԿ-ի Անվտանգության խորհրդի տխրահռչակ բանաձեւերի իրականացման հնարավորության վերաբերյալ հարցին, Լավրովը մասնավորապես ասել է.
«Մեր գործընկերուհուն՝«Մոսկվա-Բաքու» գործակալության ներկայացուցչին, ինչպես հասկանում եմ, հետաքրքրում է ղարաբաղյան հակամարտության իրավիճակը: Այդ բանաձեւերը ընդունվել են ռազմական գործողությունների ժամանակ: Դրանք շատ առումներով թույլ են տվել, հիմնականում այն քայլերի հետ, որոնք նախաձեռնվել են «երկրի վրա», այդ թվում մեր երկրի կողմից, դադարեցնել այդ արյունալի իրավիճակը, այն քաղաքական երկխոսության դաշտ տեղափոխել:
Առանց բացառության բոլոր կողմերի համաձայնությամբ ստեղծվեց ԵԱՀԿ Մինսկի խումբը, որի շրջանակներում համաձայնվեցին լուծել մնացած բոլոր հարցերը, ներառյալ տարածքների ազատագրման եւ քաղաքական կարգավորման հարցը` Լեռնային Ղարաբաղի վերջնական կարգավիճակը որոշելու միջոցով: Այդ ժամանակից մենք բոլորս դրանով ենք զբաղվում:
Ռուսաստանը ԱՄՆ-ի եւ Ֆրանսիայի հետ`որպես ԵԱՀԿ Մինսկի խմբի համանախագահ, Բաքվի եւ Երեւանի լիակատար համաձայնությամբ աշխատում է մեր առջեւ գտնվող խնդիրները լուծելու համար: Դրա իրականացման համար հակամարտության կողմերի միջեւ կոնսենսուս է հարկավոր: Երբ մենք այդ ուղղությամբ շարժվենք, ես վստահ եմ, որ կարգավորումը մոտ կլինի»:
