ԱՄ մի քանի նահանգների ղեկավարությունը, իրավապաշտպան կազմակերպությունները եւ գլխավոր դատախազը միացել են ընտանիքների բաժանման քաղաքականության դեմ պայքարին, որը մինչեւ վերջերս վարում էր ԱՄՆ ղեկավարությունը:
Ինչպես հայտնում է USA.one-ը, ընդհանուր առմամբ, ԱՄՆ նախագահ Դոնալդ Թրամփի գործողությունների դեմ դատական հայց է ներկայացրել ԱՄՆ 10 նահանգ: Այս նահանգների ղեկավարների կարծիքով՝ հրամանը, որը Թրամփը ստորագրել է նախօրեին, չի լուծում առաջացած խնդիրը, քանի որ դրանում չի նշվում, թե երբ են միգրանտներին վերադարձնելու իրենց երեխաներին:
Խումբը, որը մտադիր է խմբակային հայց ներկայացնել, կղեկավարի Միացյալ Նահանգների գլխավոր դատախազ Բոբ Ֆերգյուսոնը: Այս գործընթացին մտադիր են միանալ նաեւ Մերիլենդի եւ Մասաչուսեթսի հայտնի փաստաբանները: «Սա դաժան եւ հակասահմանադրական քաղաքականություն է: Մենք մտադիր ենք կանգնեցնել այն»,- իր ելույթում հայտարարել է գլխավոր դատախազը: Ներկայացված հայցում նշվում է, որ ընտանիքների բաժանման քաղաքականությունը խախտում է ծնողների եւ նրանց երեխաների իրավունքները, ինչպես նաեւ խտրական է ներգաղթյալների նկատմամբ:
Բացի այդ, հայցվորների խումբը կողմ է հանդես գալիս հունիսի 20-ին ստորագրված հրամանի ընդլայնմանը, որը արգելում է երեխաների բաժանումը միգրանտ ծնողներից: Ֆերգյուսոնը նշել է, որ հրամանում պետք է հստակ նշվի, թե ինչ ժամկետներում են իշխանությունները մտադիր վերամիավորել ընտանիքներին: