ՀՀ առաջին փոխվարչապետ Արարատ Միրզոյանի գրասենյակի ղեկավար Վահան Կոստանյանն աշխատանքից ազատվելու դիմում է գրել։
«Երեկ երեկոյան դիմում եմ ներկայացրել Արարատ Միրզոյանին աշխատանքային լիազորություններս դադարեցնելու համար»,– գրել է նա Facebook-ի իր էջում:
Հիշեցնենք, որ Վահան Կոստանյանն այդ պաշտոնին նշանակվել էր մայիսի 21-ին։ Վահան Կոստանյանը «Հանուն գիտության զարգացման» նախաձեռնության անդամներից է եւ ակտիվ մասնակցել է ակադեմիական տարկետման պահպանմանն ուղղված ակցիաներին:
Ավելի ուշ Կոստանյանը պարզաբանել է, թե ինչու է դիմել այդ քայլին. «Այսօր առավոտյան մասնակցել եմ ակադեմիական տարկետում շնորհող հանձնաժողովի հարցազրույցին։ Դիմումս ներկայացրել եմ, որպեսզի հանձնաժողովի անդամները չունենան որևէ կաշկանդվածություն ինձ օբյեկտիվորեն քննելու համար: Պատրաստ եմ շարունակել ծառայել ՀՀ֊ին ու միաժամակ ապացուցել, որ պետական ծառայությունն ու գիտությունը համատեղելի են»:
Ավելի վաղ «Հրապարակ»-ը գրել էր, որ Վահան Կոստանյանը դիմել է ԿԳՆ՝ բանակից ակադեմիական տարկետում ստանալու հավակնելու համար։ «Զինկոմիսարիատում հանձնաժողովը արձանագրել է, որ ունեմ բարակ աղիքի խնդիր և նորմայից մեծ քար երիկամում»,-ասել էր Կոստանյանը:
