Վրաստանի նախագահ Միխայիլ Սահակաշվիլին այսօր՝ հունվարի 25-ին Վրաստանի հեռուստատեսության ուղիղ եթերում խուսափել է հստակ պատասխան տալ հասարակ հարցին, թե մտադի՞ր է, արդյոք, պայքարել երկրի վարչապետի պաշտոնի համար 2013-ին, երբ կլրանա նրա նախագահական երկրորդ ժամկետը:
«Հիմա կարեւորը հիմնական խնդրի վրա կենտրոնանալն է, իսկ դա իշխանության ապակենտրոնացումն է: Թույլ տվեք դա անել: Ինձ մնացել է 3 տարի եւ ես կենտրոնացել եմ դրա վրա»,- ասել է նա ուղիղ եթերում ու հավելել. «Գլխավորը ոչ թե այն է, թե որտեղ կլինեմ ես, այլ այն, թե որտեղ կլինի երկիրը: Ես խորհուրդ եմ տալիս բոլորին առաջնորդվել այդ սկզբունքով»:
Վրաստանի նախագահի խոսքով, ներկայումս Վրաստանում նոր Սահմանադրություն է ընդունվել, որը ենթադրում է երկրի կոլեկտիվ ղեկավարում: Նոր Սահմանադրությունը ենթադրում է վարչապետի դերի մեծացում, որի դեմ, ի դեպ, հանդես էր գալիս Սահակաշվիլին, ով չէր ցանկանում նախագահի իշխանության թուլացում:
«Մենք ներքին դժվարություններ, տնտեսական պատժամիջոցներ ու լայնամասշտաբ ինտերվենցիա ենք հաղթահարել, եւ միայն հիմա ինչ-որ բան ստեղծելու հնարավորություն է ստեղծվել, թեեւ երկրի 20 տոկոսը զավթված է»,- ամփոփել է նա:
