Հունվարից պայմանագիր ունենք, որ եւ հին սրահի, եւ նոր սրահի աշխատողները պետք է վճարեն 50 հազար դրամ, բայց քանի որ եկան խնդրեցին, որ 2 ամսով զեղչ արվի, որոշեցինք, որ վճարեն հին գնով՝ 35 հազար դրամ: Այս մասին, այսօր՝ հունիսի 22-ին, լրագրողների հետ զրույցում նշեց «Ոսկու աշխարհ» տոնավաճառի տնօրեն Վաղարշ Աբրահամյանը՝ անդարդառնալով տոնավաճառի աշխատակիցների բողոքի ակցիային:

Նշենք, որ աշխատակիցները պահանջում են 35 հազար դրամից 20 տոկոս զեղչ արվի:

«Մենք բացատրել ենք, որ ամեն ինչ թանկանում է, որ 28 տարի առաջ 35 հազար դրամով պայմանագիր ենք կնքել: Հիմա եթե մենք սնանկանանք, չկարողանանք մեր մուծումները կատարել, ծախսերը կատարել, չե՞ք ասի՝ հո հիմար չե՞ս, չէի՞ր կարողանում հաշվարկել, տեսնել՝ քեզ ձեռնտո՞ւ է՝ այդ բիզնեսով զբաղվելը, թե ոչ:

Կառավարությունից եկել էին, ասացին 20 տոկոս իջեցրեք վարձը, մյուսները արդեն իջեցրել են: Մենք էլ 50 հազարից ենք զեղչ արել եւ վարձավճարը դարձրել 40 հազար դրամ: Ես այլեւս զիջելու տեղ չունեմ, քանի որ այդ հավաքած գումարից հարկ եմ տալիս»,-ասաց Վաղարշ Աբրահամյաննը:

Նա նշեց, որ ինքն աշխատողներին ասել է, որ եթե ձեռնտու չէ, կարող են գնալ այլ շուկաներում աշխատել. «Ես ասել եմ, որ չեմ կարողանում էդ վարձավճարում տեղավորվել, գնացեք «Ռոսիա»-ում ավելի լավ պայմաններով ոսկու բաժին կա, տեղափոխվեք այնտեղ: Կամ գնացեք «Տաշիր», էլի էստեղից մոտ է ու պայմանները մի քանի անգամ լավն են, բայց չեն ուզում տեղափոխվել: Ի՞նչ պարտադիր է, որ հավերժ այստեղ աշխատեն»:

Տնօրենի խոսքով, աշխատողների մոտ 90 տոկոսը 50 հազար վճարում է եւ գոհ աշխատում է, բողոքում են միայն 70-80 աշխատող:

Ավելի վաղ NEWS.am-ը հայտնել էր, որ Երեւանի «Ոսկու աշխարհ» շուկայի աշխատակիցները բողոքի ակցիա են իրականացնում շուկայի շենքի մոտ: Ակցիա մասնակիցները պահանջում են իջեցնել տաղավարների վարձավճարները։ Մասնավորապես, նրանց խոսքով, վարձավճարը եղել է 35 հազար դրամ, սակայն հունվարի 1-ից որոշ սրահների վարձավճարները դարձել է 50 հազար դրամ: «Քանի որ մեր սրահի մուտքը փակ էր, մեզ համար վարձը չավելացրին: Հիմա վարչապետ Նիկոլ Փաշինյանը հայտարարեց, որ վարձավճարները պետք է իջնի 20 տոկոսով, զիջում պետք է արվի: Մենք հիմա ուզում ենք, որ 35 հազարը զեղչվի 20 տոկոսով, իսկ մեզ ասում են, որ պետք է վճարեք 40 հազար: Այն տրամաբանությամբ, որ 50 հազարը 20 տոկոսով զեղչված լինում է 40 հազար, բայց մեր վճարը եղել է 35 հազար: Մենք 5 տարով պայմանագիր ունենք, որտեղ կոնկրետ նշված է վարձավճարը 35 հազար դրամ, հիմա մեկ տարի հետո ուզում են փոխել վարձավճարը»,-հայտարարել են ակցիայի մասնակիցները:

Նրանց խոսքով, շուկայի տնօրեն Վաղարշ Աբրահամյանն էլ սպառնացել է փակել այդ սրահը, եթե չվճարեն իր ասած գումարը: