Գերմանիայի ՆԳ նախարար Հորսթ Զեեխովերը հաստատել է փախստականների համար սահմանային հսկողությունն ուժեղացնելու մտադրությունը, նույնիսկ եթե կանցլեր ԱՆգելա Մերկելը չկարողանա պայմանավորվել ԵՄ գործընկերների հետ։ Այս մասին նա հայտնել է հարցազրույցում, որը հրապարակվել է Suddeutsche Zeitung թերթում։
«Եթե ԵՄ գագաթաժողովին չգտնվեն արդյունավետ լուծումներ, ապա մենք կսկսենք արտաքսել միգրանտներին, որոնք գրանցված են ԵՄ որեւէ այլ երկրում»,- ասել է նա։
Ապօրինի միգրացիային հակազդելու խնիրը լուրջ տարաձայնությունների պատճառ է դարձել Գերմանիայի կառավարությունում։
Ավելի վաղ Զեեխովերը հայտնել էր, որ կարող է միակողմանի կարգով արձակել հրաման, որը երկրի ոստիկանությանը թույլտվություն կտա սահմաններին զանգվածային հսկողություն սկսել ու արտաքսել այն միգրանտներին, որոնց Գերմանիայի տարածքում ապաստան չի տրամադրվել։
Բավարական Քրիստոնյա – սոցիալական միությունը Մերկելին երկու շաբաթ է տվել միգրացիոն խնդիրը եվրոպական մակարդակի վրա լուծելու համար։
Կանցլերն ի պատասխան Զեեխովերին հիշեցրել է գերմանական քաղաքականության մեջ լիազորությունների տարանջատման մասին, որը ենթադրում է նաեւ ցանկացած նախարարի աշխատանքից հեռացնելու հնարավորություն։
«Կանցլերի գերատեսչությունում ուռճացրել են խնդիրը։ Կոալիցիոն գործընկերոջը լիազորություններով սպառնալը շատ արտասովոր է։ Մենք չենք համակերպվի դրան»,- ասել է ՆԳ ղեկավարը այսօրվա հարցազրույցում։ Մինչ այդ նա արդեն խոսում էր իշխող բլոկի հնարավոր տրոհման մասին, եթե իրեն հեռացնեն պաշտոնից։