Հայաստանում տեղի ունեցած իրադարձությունները հենց հեղափոխական են եղել, քանի որ իշխանության էությունն է ձևափոխվել։ Այս մասին «Ընտրական օրենսգիրքը որպես քաղաքացիական հասարակության անկյունաքար» թեմայով քննարկումների ժամանակ հունիսի 23-ին հայտնել է Աղասի Ենոքյանը։
Նրա խոսքով՝ Ընտրական օրենսգրքին զուգահետ անհրաժեշտ է քննարկել նաև սահմանադրական փոփոխությունները։ «Մեր երկրում ընտրական օրենսգիրքը իրավաբանական փաստաթուղթ չէ։ Այն ավելի շուտ քաղաքական փաստաթուղթ է։ Ու առայսօր արվում էր ամեն ինչ այն խախտելու համար, մինչդեռ իրականում այն պետք է ձևավորեր իշխանությունը»,- ասել է Ենոքյանը։
Ընդ որում նա նշել է, որ ԸՕ-ն մինչև այսօր օգտագործվել է ակնհայտ խախտումներով՝ այս կամ այն անձանց շահերի համար՝ սեփական քաղաքական իշխանությունը վերարտադրելու նպատակով։
Գնահատական տալով Հայաստանի վերջին իրադարձություններին՝ Ենոքյանը վստահություն է հայտնել, որ տեղի է ունեցել խաղաղ, բայց շատերի համար անսպասելի հեղափոխություն։ Սակայն հեղափոխությունը, նշեց քաղաքագետը, միշտ անսպասելի է տեղի ունենում, ինչը միանգամայն բնական ու նորմալ է։
Փորձագետը համարում է, որ ժամանակը ՀՀԿ-ի օգտին չէ, քանի որ այն հասարակության աչքերում լրիվ հեղինակազրկվել է։ «Մենք ինքներս ենք տեսնում, թե ինչպես են այդ կուսակցության շարքային ու նույնիսկ բարձրաստիճան անդամները լքում դրա շարքերը։ Այնպես որ ՀՀԿ-ն ինքն է շահագրգռված, որպեսզի արտահերթ ընտրությունները հնարավորինս շուտ անցնեն, քանի դեռ ՀՀԿ-ն վերջնականապես չի տապալվել»,- ամփոփեց Աղասի Ենոքյանը։