Մեքսիկայի Օկամպո քաղաքի ոստիկանության շուրջ 30 աշխատակից կիրակի առավոտյան ձերբակալվել է՝ հանցավոր աշխարհի հետ կապերի ու քաղաքապետի թեկնածուի սպանությանn առնչության կասկածանքով, հայտնում է Universal պորտալը։ Օկամպոյի քաղաքապետի թեկնածու, Ժողովրդավարական հեղափոխության կուսակցության անդամ Ֆերնանդո Անխելես Խուարեսին սպանել էին մի քանի օր առաջ։ Զինված հանցագործները վաղ առավոտյան մեքենայով մոտեցել են նրա տանը ու կրակել նրա վրա։
Ձերբակալվածներից մեկը քաղաքային ոստիկանության տնօրենն է, որը նախօրեին հրազեն էր կիրառել, երբ նրան փորձել են տանել հարցաքննության։ Ձերբակալությունները իրականացրել են Միչոական նահանգի հանրային անվտանգության նախարարության աշխատակիցները, կասկածյալներին հասցրել էին Մորելիա քաղաք՝ հետագա հարցաքննության համար։
Etellekt գործակալության տվյալներով՝ հունիսի 9-ի դրությամբ Մեքսիկայում նախընտրական քարոզարշավի շրջանակում 112 քաղաքական գործիչ է սպանվել։ 28-ը պատրաստվում էին թեկնածություն առաջադրել ընտրովի պաշտոնների համար, իսկ 14-ն արդեն գրանցել էին իրենց թեկնածությունը։
Այս բռնությունների ֆոնին Մեքսիկայի իշխանությունները հայտարարել են, որ հուլիսի 1-ին ծրագրված համընդհանուր ընտրությունների բոլոր մակարդակների թեկնածուներին պարտադիր թիկնապահներ են տրամադրվելու։