Կիրակի օրը Իտալիայի կառավարությունը արգելել է փրկարարական նավերին օգնություն ցուցաբերել փախստականների տեղափոխող նավերին՝ չնայած աղետի մասին ազդանշաններին: Այս մասին հաղորդում է «ՌԻԱ Նովոստի»-ն՝ վկայակոչելով The Independent-ը:
Իտալիայի իշխանությունների հայտարարության համաձայն՝ Միջերկրական ծովով Եվրոպա ուղեւորվող փախստականներով նավերը աղետի մասին ազդանշաններ են ուղարկում լիբիական ջրային տարածքներից, ուստի նրանց փրկությունը Լիբիայի պարտականությունն է:
Ավելի վաղ Իտալիան արգելել էր փախստականներով փրկարարական նավերին կայանել իտալական նավահանգիստներում, ինչի պատճառով որոշ նավեր ստիպված են լողալ դեպի Իսպանիայի ափերը: Իտալիայի արտգործնախարար Մաթեո Սալվինին հայտարարել էր, որ փախստականներն այլեւս չեն կարողանա երկիր մուտք գործել ծովով: Բացի այդ, Իտալիան սպառնացել է դադարեցնել վճարումները ԵՄ-ին, եթե այն չվերանայի մայրցամաքում փախստականների տեղաբաշխման ուղիները: