Մարդու իրավունքների խախտումների դեմ պայքարի խնդիրը շարունակում է գերակա առաջնահերթություն լինել: Մարդու իրավունքների վերաբերյալ հանրային քննարկումների ժամանակ այս մասին հայտարարել է Հայաստանի Հանրապետության արդարադատության փոխնախարար Սուրեն Քրմոյանը: Քննարկումները կազմակերպվել են «Հանուն հավասար իրավունքների» հասարակական կազմակերպության կողմից ԵՄ-ի եւ Բաց հասարակության հիմնադրամի կողմից ֆինանսավորվող երկամյա ծրագրի շրջանակներում:
Քրմոյանի խոսքով՝ 20-10 տարի առաջ տիրող իրավիճակի համեմատ լուրջ առաջընթաց կա: «Նախեւառաջ՝ օրենսդրության մշակումը, դրա համապատասխանեցումը միջազգային փորձին: Սակայն սրանով աշխատանքը չի ավարտվում: Մենք ավելի մեծ կարեւորություն ենք տալիս գործնական քայլերին, առաջին հերթին՝ բռնության վերացմանը փակ հաստատություններում՝ բանտերում, կլինիկաներում, մեկուսարաններում»,- նշել է փոխնախարարը:
Փոխնախարարը կարեւորել է նաեւ հասարակության մասնակցությունը: Որպես կանխարգելիչ միջոցառումներ՝ նա նշել է խոշտանգումների եւ նվաստացման համար պատժամիջոցների խստացումը (նման հանցագործությունների համար դատապարտվածները չեն կարող օգտվել վաղաժամկետ ազատությունից եւ պատժի մեղմացումից):
«Մեր հասարակությանն իրավիճակի ավելի մեծ փոփոխության կարիք ունի»,- ասել է Սուրեն Քրմոյանը՝ կոչ անելով բոլորին միասին արմատախիլ անել այս բացասական երեւույթը:
