Մարդու իրավունքների պաշտպանի գրասենյակը հետեւում է խոշտանգումների դեպքերին։ Այս մասին այսօր՝ հունիսի 25-ին հայտարարեց ՀՀ մարդու իրավունքների պաշտպանի աշխատակազմի քրեական արդարադատության ոլորտում եւ զինված ուժերում մարդու իրավունքների պաշտպանության դեպարտամենտի ղեկավար Արտյոմ Սեդրակյանը մարդու իրավունքների հարցերով հանրային քննարկման ժամանակ։ Քննարկումները կազմակերպել է «Հանուն հավասար իրավունքների» կրթական կենտրոնը Եվրամիության եւ Բաց հասարակություն հիմնադրամի կողմից ֆինանսավորվող երկամյա ծրագրի շրջանակում։
«Ցավոք, 21-րդ դարում մենք դեռ խոսում ենք այս թեմայով»,–նկատեց Սեդրակյանը՝ հավելելով, որ փաստեր դեռեւս կան եւ ստիպված են այն քննարկել։ Սեդրակյանի խոսքով, վերջին աղմկոտ դեպքը Մարդու իրավունքների պաշտպանի աշխատակազմի կողմից բացահայտվել է հոգեբուժարանում։ Նա հավելեց, որ խնդիրն էական է, իսկ խոսքը լայն իմաստով պաշտոնատար անձի մասին է, չնայած բժշկին անմիջապես պաշտոնատար անձ անվանելը ճիշտ չէ, բայց էությունն այդ է։
Նրա խոսքով, քաղաքացիական հասարակության մասնակցությունը մարդու իրավունքների խախտումների խնդրի լուծման հարցում բարդ է գերագնահատել. «Մենք ձգտում ենք, որ ոչ մի այդպիսի դեպք մեր ուշադրությունից դուրս չմնա»,–հայտարարեց նա։
