Սոցիալական ցանցերի օգտատերերն ակտիվորեն մեկնաբանում են Կազանի կրկեսում այցելուների վրա ջայլամի հարձակման տեսանյութը: Անցյալ շաբաթվա վերջին կրկեսային համարի ժամանակ հսկայական ջայլամը խուճապի էր մատնվել, վազել էր դեպի հանդիսատեսը եւ անգամ հաջողացրել է երեխայի կտցահարել, փոխանցում է «Վեստի»-ն:
Տեսանյութում երեւում է, թե ինչպես է վարժեցնողը, կորցնելով կենդանու վերահսկումը, ինչ-որ պահի անհույսությունից բռնում գլուխը, ապա անմիջապես սթափվում է եւ տանում թռչունին: Շուտով կրկեսային ներկայացումը շարունակվում է:
Կրկեսում արդեն մեկնաբանել են միջադեպը՝ հայտնելով, որ այս ջայլամն այլեւս չի մասնակցի ներկայացումներին: Թաթարստանի առողջապահության նախարարությունը, իր հերթին, հայտնել է, որ ջայլամի հարձակումից հետո ոչ ոք բժշկական օգնության չի դիմել: