Հայաստանի ԱԳ նախարար Զոհրաբ Մնացականյանը այսօր՝ հունիսի 25-ին, հեռախոսազրույց ունեցավ Վրաստանի նորանշանակ արտգործնախարար Դավիդ Զալկալիանիի հետ:
ԱԳՆ-ից NEWS.am-ին հայտնում են, որ շնորհավորելով գործընկերոջը բարեկամ Վրաստանի ԱԳ նախարարի պաշտոնը ստանձնելու կապակցությամբ՝ Զոհրաբ Մնացականյանը հաջողություն մաղթեց Դավիդ Զալկալիանիին իր կարեւոր առաքելությունում եւ վերահաստատեց հայկական կողմի պատրաստակամությունը՝ շարունակելու համատեղ աշխատանքը երկկողմ համագործակցությունն առավել խորացնելու ուղղությամբ։
Շնորհակալություն հայտնելով բարեմաղթանքների եւ շնորհավորանքի համար՝ Վրաստանի նորանշանակ արտգործնախարարը նշեց, որ բարձր է գնահատում այն հարաբերությունները, որոնք պատմականորեն ձեւավորվել են մեր երկու ժողովուրդների եւ պետությունների միջեւ։
Անդրադառնալով ՀՀ վարչապետի՝ Վրաստան կատարած պաշտոնական այցելությանը՝ կողմերն ընդգծեցին, որ այդ այցը եւ դրա ընթացքում ձեռք բերված պայմանավորվածություններն ամուր հիմք են ստեղծում երկկողմ հարաբերությունների առավել ամրապնդման եւ ընդլայնման համար։
Զրուցակիցները մտքեր փոխանակեցին երկկողմ եւ բազմակողմ ձեւաչափերով համագործակցության շուրջ։