Կաթի մթերման գին թելադրելն անընդունելի է։ Այսպիսի կարծիք հունիսի 25-ին «Ազատություն» ռադիոկայանի ֆեյսբուքյան ասուլիսի ժամանակ հայտնել է ՀՀ գյուղատնտեսության նախարար Արթուր Խաչատրյանը՝ մեկնաբանելով Գեղարքունիքի մարզի գյուղացիների բողոքները կաթի գնի եւ գնման ծավալների առնչությամբ։
Նրա խոսքով, սա անխուսափելիորեն շղթայական ռեակցիայի կբերի եւ անհրաժեշտ կլինի ֆիքսել նաեւ մյուս գյուղատնտեսական ապրանքների մթերման գները։ Նախարարը կարծում է, որ Հայաստանում կաթի առաջարկի ու պահանջարկի միջեւ հավասարակշռության հաստատման համար սկզբից անհրաժեշտ է պարզել, թե ուր է գնում զգալի քանակով ներկրվող չոր կաթը, որն այս տարի արդեն կազմել է 2884 տոննա։
«Ես բնավ չեմ հայտարարում, որ չոր կաթի օգտագործումը արտադրությունում պետք է արգելվի, սակայն նշագրմամբ պետք է մատնանշվի, թե ինչից է պատրաստված մթերքը՝ չոր, թե՞ բնական կաթից»,–նշել է Արթուր Խաչատրյանը։
Նա հավելել է, որ արդեն նամակ է հղել ՍԱՊԾ–ին՝ խնդրանքով պարզաբանել կաթնամթերքի բաղադրությունը մեծածախ եւ մանրածախ վաճառքի ցանցում եւ համապատասխան նշագրման առկայությունը։
«Պետությունը չպետք է միջամտի շուկայական հարաբերություններին եւ գներ թելադրի, նրա միջամտությունը պարտադիր է միայն շուկայի փլուզման եւ չարաշահումների բացահայտման դեպքում»,–շեշտել է նախարարը։
Նա նկատել է, որ պետությունը պարտավոր է կարգավորել շուկայական խնդիրները, քանի որ կաթը եկամտի աղբյուր է հանդիսանում 100 000 գյուղատնտեսների համար եւ գների տատանումը կամ գերակա դիրքի չարաշահումը նրանց գոյությունն անմիջական սպառնալիքի տակ կդնեն։