Ռուսաստանի նախագահ Վլադիմիր Պուտինը շնորհավորել է Թուրքիայի նախագահ Ռեջեփ Թայիփ Էրդողանին հունիսի 24-ի նախագահական ընտրություններում տարած հաղթանակի կապակցությամբ եւ հաջողություն մաղթել հետագա պետական գործունեության մեջ:
Կրեմլի մամուլի ծառայությունը հայտնում է, որ հեռախոսազրույցի ընթացքում հաստատվել են երկու երկրների միջեւ գործընկերային հարաբերությունների ընդլայնման հարցում փոխադարձ հետաքրքրվածությունը։ Նշվել է նաեւ էներգետիկայի բնագավառում ռազմավարական համատեղ նախագծերի` «Ակկույու» ատոմակայանի եւ «Թուրքիական հոսք» գազատարի առաջնային բնույթը:
Կողմերը պայմանավորվել են սերտորեն համագործակցել սիրիական կարգավորման հարցերի շուրջ:
Ավելի վաղ Վլադիմիր Պուտինը շնորհավորական հեռագիր էր ուղարկել Ռեջեփ Թայիփ Էրդողանին Թուրքիայի Հանրապետության նախագահի պաշտոնում վերընտրվելու, ինչպես նաեւ երկրում անցկացված ընտրություններում Արդարություն եւ զարգացում կուսակցության հաղթանակի կապակցությամբ: