Կոմպոզիտոր, Երեւանի ավագանու ՀՀԿ խմբակցության անդամ Երվանդ Երզնկյանը չի դիտել Տարոն Մարգարյանի ունեցվածքի մասին պատմող տեսանյութը, բայց կհավատա միայն դատարանի կողմից ներկայացված փաստերին։ Այս մասին կոմպոզիտորը հայտարարել է այսօր՝ հունիսի 26-ին լրագորղների հետ զրույցում՝ պատասխանելով հարցին, թե իր կարծիքով ինչպես կարող էր Տարոն Մարգարյանը այդքան հարստություն դիզել, եթե ոչ ապօրինի ճանապարհով։
«Կյանքը ինձ սովորեցրել է հավատալ միայն այն փաստերին, որոնք դատարանն է ներկայացնում։ Մինչեւ դատարանը որոշում չկայացնի, ես իրավունք չունեմ կարծիք հայտնել»,–նկատել է նա։
Երզնկյանը ուրախ է օրինականության հաստատման եւ Ազգային անվտանգության ծառայության կողմից վերջին օրերին կատարվող գործողությունների համար. «Մարդ ամեն ինչի համար պետք է վճարի»,–շեշտեց կոմպոզիտորը։
Հարստությունների դիզման մասին հարցին ի պատասխան Երզնկյանը ընդգծեց, որ ինքը, լինելով 71 տարեկան, ապրում է երկուսենյականոց բնակարանում, չունի մեքենա, եւ դա է հնչեցված հարցի պատասխանը։
