ԱՄՆ առեւտրի հարցերով ներկայացուցիչ Ռոբերտ Լայթհայզերը մեղադրել է Եվրամիության անդամ երկրներին եւ Առեւտրի համաշխարհային կազմակերպության (ԱՀԿ) անդամներին, որոնք պատասխան մաքսատուրքեր են սահմանել ԱՄՆ-ից ապրանքների ներմուծման համար, ԱՀԿ-ի կանոնների անեսման համար, փոխանցում է «ՌԻԱ Նովոստի»-ն:
«Մի քանի ամիս շարունակ Եվրամիությունը, Չինաստանն ու մյուսները քննադատել են Միացյալ Նահանգների առեւտրային քաղաքականությունը՝ ընդ որում, պաշտպանելով ԱՀԿ-ին: Սակայն նրանց վերջին մաքսատուրքերն ապացուցում են, որ նրանք պարզապես անտեսում են ԱՀԿ-ի կանոնները, երբ դա նրանց համար ձեռնտու է դառնում»,- նշվում է Լայթհայզերի հայտարարության մեջ, որն ուրբաթ օրը հրապարակվել էր նրա գերատեսչության կայքում:
Նրա խոսքով՝ ԱՄՆ-ի կողմից սահմանված մասքսատուրքերն օրինական են, քանի որ ուղղված են ազգային անվտանգության շահերի պաշտպանությանը, ինրը նախատեսված է ԱՀԿ կանոններով: Նրա կարծիքով՝ սակագների եւ առեւտրի մասին Գլխավոր համաձայնագրի 21-րդ հոդվածը ԱՀԿ-ի անդամներին լայն իրավունքներ է տալիս՝ անհրաժեշտության դեպքում իրենց անվտանգությունն ապահովելու համար: Եվ յուրաքանչյուր երկիր պետք է իրավունք ունի ինքնուրույն որոշել, թե ինչ պետք է անի դրա համար, վստահ է Միացյալ Նահանգների առեւտրային ներկայացուցիչը:
«Ի տարբերություն դրան՝ Եվրամիությունը անհիմն իրավական տեսություն է հորինել՝ ամերիկյան արտահանման համար մաքսատուրքերի անհապաղ ներդրումն արդարացնելու համար: ԱՀԿ-ի մյուս անդամները, այդ թվում նաեւ՝ Չինաստանը, զբաղեցրել են նույն դիրքը»,- ասում է Լայթհայզերը:
Ամերիկյան ապրանքների նկատմամբ պատասխան մաքսատուրքերը, նրա կարծիքով, վնաս են հասցնում միջազգային առեւտրային համակարգին եւ վկայում են ԱՀԿ կանոնների խեղաթյուրման մասին: Այդ կապակցությամբ, ասել է նա, ԱՄՆ-ն « իր շահերը պաշտպանելու համար կձեռնարկի բոլոր անհրաժեշտ միջոցները՝ սեփական եւ միջազգային օրենսդրության համաձայն»: