Հայաստանի համար նոր ժամանակաշրջան է բացվել: Այս մասին ԱՄՆ Սենատում կայացած պետական մակարդակով հաստատված հայ-ամերիկյան հարաբերությունների 100-ամյակին նվիրված ընդունելության ժամանակ նշել է ԱՄՆ պետքարտուղարության ներկայացուցիչ Ջորդան Էնդրյուսը, հաղորդում է «Ամերիկայի ձայնը»:
«Մեր երկրների միջեւ մեկ դար առաջ սկսված գործընկերությունը շարունակվում է առայսօր: ԱՄՆ-ը շարունակում է սատարել Հայաստանին ինքնավար, բարգավաճող, ժողովրդավար պետություն ստեղծելու հարցում»,-ասել է նա:
Ընդունելությանը մասնակցել է նաեւ ՀՀ նախագահ Արմեն Սարգսյանը, ով ընդգծել է, որ Հայաստանի հպարտ քաղաքացին է իրականացրել խաղաղ իշխանափոխությունը. «Մենք պետք է հպարտ լինենք, որ կարող ենք աշխարհին օրինակ ծառայել»,-ասաց նա:
Երբ Արմեն Սարգսյանն անցել է հեղափոխության առաջնորդներին թվարկելուն, դահլիճը պայթել է ծափահարություններից. «Հատուկ հարգանք պետք է հատուցել նրանց, որոնք Հայաստանի փողոցներում էին հավաքվել, առաջին հերթին ցուցարարներին եւ նրանց առաջնորդ Նիկոլ Փաշինյանին»:
Ամերիկացի սենատոր Բոբ Մենենդեսն իր հերթին նշել է. «ՀՀ քաղաքացիները հիացրեցին ամբողջ աշխարհին՝ խաղաղ բողոքների միջոցով ժողովրդավարական կառավարություն բերելով իշխանության»:
«Նոր Հայաստանը, որտեղ հաղթել է ժողովրդավարությունն ու ազատությունը, արժանի է ԱՄՆ զգալի աջակցության»,-ասել է կոնգրեսական Ջեքի Սփիրը՝ հավելելով, որ ինքը պայքարում է, որ Հայաստանը ֆինանսական աջակցություն ստանա «Հազարամյակի մարտահրավերներ» ամերիկյան պետական կորպորացիայից: «Հաղթաժ ժողովուրդն արժանի է լավ ապրելու»,-ասել է կոնգրեսականը:
