Հարավային Կորեայի նախագահ Մուն Չժե Ինը մրսածության պատճառով չեղարկել է հինգշաբթի նախատեսված հանդիպումը Սեուլում այցով գտնվող ԱՄՆ պաշտպանության նախարար Ջեյմս Մետիսի հետ, հայտնում է ՏԱՍՍ–ը։ Կորեայի Հանրապետության նախագահի վարչակազմը հաղորդել է, որ չեղարկվել են Մուն Չժե Ինի մասնակցությամբ հինգշաբթի եւ ուրբաթ նախատեսված բոլոր պաշտոնական միջոցառումները։
Ներկայումս ԱՄՆ պաշտպանության նախարարը Սեուլում բանակցություններ է վարում իր հարավկորեական գործընկեր Սոն Յոն Մուի հետ։ Ենթադրվում է, որ հանդիպմանը առաջին հերթին քննարկվում է տարվա երկրորդ կեսին նախատեսված համատեղ զորավարժությունների չեղարկումը՝ ի շահ Հյուսիսային Կորեայի հետ երկխոսության զարգացման։ Դրանց թվում է Ulchi Freedom Guardian համատեղ զորաշարժը, որը Փհենյանը անվանում է Հյուսիսային Կորեա ներխուժելու պատրաստություն։