Պատժամիջոցներն ճնշում կգործադրեն Իրանի բնակչության վրա եւ դժվարություններ կստեղծեն: Այս մասին հայտարարել է երկրի նախագահ Հասան Ռոհանին՝ ելույթ ունենալով Բենդեր Աբասում նավթավերամշակման գործարանի բացման արարողության ժամանակ, փոխանցում է «ՌԻԱ Նովոստի»-ն:
Նրա խոսքով՝ Իրանը պատմական պահ է ապրում եւ պետք է դիմակայի երկրի դեմ ծառացած սպառնալիքներին՝ դրանք հնարավորությունների վերածելով:
«Պատժամիջոցները ճնշում կգործադրեն ժողովրդի վրա: Այս պատժամիջոցները, անշուշտ, դժվարություններ կստեղծեն ժողովրդի համար, սակայն բազմաթիվ հնարավորություններ կստեղծեն նախաձեռնությունների, ստեղծագործական գործունեության համար ճնշողների աչքերի առջեւ», - ասել է նախագահը, ում ելույթը հեռարձակվել է պետական հեռուստատեսությամբ:
Իրանի նախագահը ԱՄՆ-ի՝ միջուկային գործարքից դուրս գալուց հետո այտարարել էր, որ Վաշինգտոնը տնտեսական ճնշում է գործադրում Թեհրանի վրա եւ հոգեբանական պատերազմ է վարում երկրի դեմ՝ ընդ որում, ընդգծելով, որ Իրանի տնտեսությունը կշարունակի զարգանալ: