ԱՄՆ-ն կարծում է, որ Իրանը չի հրաժարվել միջուկային զենք ստեղծելու իր մտադրությունից: Այս մասին Նյու Դելիում Observer Research Foundation հետազոտությունների կենտրոնում իր ելույթի ժամանակ հայտարարել է ՄԱԿ-ում ԱՄՆ մշտական ներկայացուցիչ Նիքի Հեյլին:
Հնդկաստանում աշխատանքային այցով գտնվող ամերիկացի դիվանագետը փորձել է բացատրել այն պատճառները, թե ինչու է Դոնալդ Թրամփի վարչակազմը որոշել իակողմանի դուրս գալ Իրանի հետ միջուկային գործարքից՝ Գործողությունների համատեղ համապարփակ ծրագրից: Ըստ Հեյլիի, որի ելույթը հեռարձակվում էր Observer Research Foundation-ի կայքում՝ ԱՄՆ-ն սպառնալիքի աղբյուր է տեսնում ի դեմս Իրանի, եւ այդ կարծիքը հիմնված է ոչ թե ենթադրությունների, այլ «իրական ապացույցների վրա»:
«Մենք տեսնում ենք, որ չնայած Իրանի հետ գործարքին, որը ձեռք էր բերվել բազմաթիվ երկրների մեծ ջանքերի արդյունքում, նրանք (Իրանի ղեկավարությունը) շարունակում են խախտել ՄԱԿ-ի Անվտանգության խորհրդի բանաձեւերը: Նրանք շարունակում են բալիստիկ հրթիռների մշակումը: Նրանք աջակցում են ահաբեկչությանը՝ շարունակելով Յամենում զենք վաճառել ապստամբներին: Մերձավոր Արեւելքում բոլոր հակամարտությունների հետեւում մենք Իրանին ենք տեսնում»,- ասել է ԱՄՆ մշտական ներկայացուցիչը:
Նա հաստատել է, որ Միացյալ նահանգներն ակնկալում են քաղաքական եւ տնտեսական ճնշման միջոցով ստիպել Իրանին նստել բանակցային սեղանի շուրջ, փոխզիջումների գնալ եւ փոփոխություններ մտցնել իր միջուկային ծրագրի վերաբերյալ համաձայնագրում, որը կնքվել է 2015 թվականին ՄԱԿ-ի Անվտանգության խորհրդի հինգ մշտական անդամների (ԱՄՆ, Ռուսաստան, Մեծ Բրիտանիան, Ֆրանսիան, Չինաստանը) եւ Գերմանիայի մասնակցությամբ:
