Իրանի եւ ԱՄՆ-ի հարաբերությունները սրվում են վերջինիս՝ Իրանի միջուկային գործարքից դուրս գալու պատճառով: Այս մասին հունիսի 29-ին լրագրողների հետ հանդիպման ժամանակ ասաց «Մոդուս Վիվենդի» հետազոտական կենտրոնի տնօրեն, փորձագետ Արա Պապյանը:
Ընդ որում, Եվրոպայի դիրքորոշումն այս հարցով, ըստ նրա, ավելի մեղմ է: «Կարծում եմ, որ Հայաստանի նոր իշխանությունների համար հնարավորություններ են ստեղծվել, եւ սպասելու փոխարեն անհրաժեշտ է նախաձեռնություն ցուցաբերել՝ Իրանի եւ ԱՄՆ միջեւ որոշակի քաղաքական միջնորդություն իրականացնելու փորձի ձեւով»,- ասաց Պապյանը` նշելով, որ Հայաստանը՝ որպես միջնորդ, ընդունելի է եւ՛ Վաշինգտոնի, եւ՛ Թեհրանի համար:
Իրանի համար Հայաստանը ձեռնտու է, քանի որ, ինչպես նշեց քաղաքագետը, քրիստոնյա երկիր է, սակայն, ի տարբերություն Ադրբեջանի, Թեհրանի հետ որեւէ խնդիր չունի: Ինչ վերաբերում է Միացյալ Նահանգներին, ապա այս երկրում հայկական սփյուռքը բավականին լուրջ դիրքեր եւ ազդեցություն ունի, ինչը կարելի է օգտագործվել: