2018 թվականին առավել մեծ թվով լրագրողներ են սպանվել Աֆղանստանի տարածքում, հայտնում է Լրագրողների պաշտպանության կոմիտե (Committee to Protect Journalists) միջազգային հասարակական կազմակերպությունը, որի կենտրոնակայանը Նյու Յորքում է:
Կազմակերպության վերջին տվյալների համաձայն՝ այս տարի աշխարհում զոհված 33 լրագրողներից 10-ը բաժին է ընկնում Աֆղանստանին: Սիրիայում զոհվել են լրատվամիջոցների 5 ներկայացուցիչներ, ԱՄՆ-ում՝ 4, Հնդկաստանում՝ 3:
Այս ժամանակահատվածում երկուական լրագրող է զոհվել Կոլումբիայում, Իսրայելում եւ պաղեստինյան տարածքներում, Մեքսիկայում, Եմենում, լրատվամիջոցների մեկական ներկայացուցիչ է սպանվել Բրազիլիայում, Նիկարագուայում եւ Սլովակիայում, փոխանցում է «Ինտերֆաքսը»:
