Փեշմարգայի քրդական զինված կազմավորումները Իրաքի հյուսիսում իրականացրած գործողության ընթացքում ոչնչացրել են ԻՊ ահաբեկչական կազմակերպության ղեկավարներից մեկին, որը պատասխանատու էր գրոհայինների ֆինանսավորման եւ մատակարարումների համար, հայտնում է Rudaw հեռուստաալիքը:
Մախմուր քաղաքում (Էրբիլ նահանգ) փեշմարգայի ղեկավար Սիրվան Բարզանին հայտարարել է, որ Քարաչոգ լեռան շրջանում գործողությունը սկսվել է շաբաթ երեկոյան՝ ԱՄՆ գլխավորած միջազգային կոալիցիայի օդանավերի աջակցությամբ: Նույն օրը գործողության մասնակիցները ոչնչացրել են ԻՊ ֆինանսիստ Աբու Օբեյդային: Եվս երկու ահաբեկիչ ոչնչացվել էին կիրակի:
Իրաքի կառավարությունը ԻՊ-ի լիակատար ջախջախման մասին հայտնել էր 2017-ի դեկտեմբերին: Չնայած դրան, երկրի հյուսիսում խմբավորման մնացորդների եւ Իրաքի անվտանգության ուժերի միջեւ կարճատեւ բախումներ են տեղի ունենում: Ողջ մնացած գրոհայիններն առնաձնապես ակտիվ են գործում երկրի հյուսիսում Մախմուրի շրջանում եւ Սալահ էդ Դին նահանգի Խամրինի լեռներում, հայտնում է հեռուստաալիքը:
