ՀԱՊԿ գործընկերներն իրազեկված են նախիջեւանյան ուղղությամբ Ադրբեջանի գործողությունների մասին: Այս մասին հուլիսի 2-ին ճեպազրույցի ժամանակ հայտնեց ԱԳՆ մամուլի քարտուղար Տիգրան Բալայանը:

Նա հատուկ շեշտեց, որ համաձայն չէ այն կարծիքին, թե Արցախում տեղի ունեցողը Հայաստանի հետ կապ չունի: «Շփման գծում տեղի ունեցող ամեն ինչը Հայաստանի հետ ուղղակի կապ ունի: Մեր դիվանագետները նաեւ գիտակցում են, որ իրենց աշխատասենյակներից մինչեւ սահման շատ մոտ է: Համապատասխանաբար՝ ՀԱՊԿ գործընկերները օպերատիվորեն իրազեկվել են, չնայած հանգստյան օրեր էին»,- նշեց Բալայանը:

Ի պատասխան նախիջեւանյան ուղղությամբ ՀԱՊԿ ուժերի տեղակայման հնարավորության մասին հարցին՝ Տիգրան Բալայանը նշեց, թե չի կարծում Հայաստանի ԶՈՒ-ն իրավիճակի վերահսկողության համար դրսից օժանդակության կարիք ունի: «Սահմանների պաշտպանությունը դրված է Հայաստանի ԶՈՒ վրա, եւ ինչպես ցույց են տալիս վերջին օրերի իրադարձությունները, այն իր վրա դրված խնդիրը վստահ եւ արդյունավետորեն է կատարում»,- շեշտեց Բալայանը:

Հիշեցնենք, որ հունիսի 30-ին եւ հուլիսի 1-ի առավոտյան Ադրբեջանի ԶՈՒ-ն փորձել է Նախիջեւանի ուղղությամբ հայ-ադրբեջանական սահմանին դիրքային ամրապնդման ինժեներական աշխատանքներ իրականացնել: Հայկական կողմի կրակի հետեւանքով կործանվել եւ ամբողջությամբ այրվել է հակառակորդի դիրքերից մեկը: Հրաձգության հետեւանքով թեթեւ վիրավորում է ստացել Հայաստանի ԶՈՒ պայմանագրային զինծառայող Վահագն Սամվելի Բաղդասարյանը (1974 թ.):

Նախիջեւանի ուղղությամբ հակառակորդը փորձել է ամրապնդել դիրքերը. հայ զինծառայող է վիրավորվել