Զինված ուժերն ունակ են զինծառայողներին ապահովելու ամեն անհրաժեշտ պարագաներով։ Այս մասին այսօր՝ հուլիսի 2-ին ՀՀ ՊՆ կենտրոնական հավաքակայանում լրագրողների հետ զրույցում հայտնեց  Հայաստանի զինված ուժերի գլխավոր շտաբի պետ, գեներալ-մայոր Արտակ Դավթյանը։

ԳՇ պետը շնորհավորեց բոլորին 2018 թվականի ամառային առաջին զորակոչի առթիվ, ապա շեշտեց՝ երկար են պատրաստվել այս զորակոչին, բավականին շատ աշխատանքներ են կատարվել։ «Հույս ունեմ զորակոչը կանցնի առանց խոչընդոտների ու միջադեպերի։ Եթե խնդիրներ էլ լինեն, օպերատիվ կերպով կփորձենք միջամտել»։ 

Հարցին՝ կարո՞ղ են արդյոք ծնողները վստահ լինել, որ իրենց երեխաները ապահովված են անհրաժեշտ պարագաներով, նա ընդգծեց. «Զինված ուժերն ունակ են զինծառայողներին ապահովելու այն ամեն ինչով, ինչ նախատեսված է օրենքի կարգով։ Եթե կլինեն դեպքեր եւ տեղեկություններ, որ որեւէ զորամասում չի ապահովվում ինչ–որ բանով, մենք պատրաստ ենք օպերատիվորեն արձագանքելու, որոշումներ կայացնելու եւ լուծումներ տալու այդ հարցերին»։

Արտակ Դավթյանը նկատեց՝ մինչ այս եղել է 5 ահազանգ, «որոնցից միայն մեկի դեպքում հաստատվեց, որ ինչ–որ խախտումներ կային, ոչ ամբողջ ծավալով։ Մենք օպերատիվ ձեւով արձագանքեցինք»։