2018 թվականի առաջին 6 ամիսներին 22 երկրում 66 լրագրող է զոհվել: Այս տվյալները ներկայացված են Ժնեւում հրապարակված Press Emblem Campaign հասարակական կազմակերպության զեկույցում, որում համաշխարհային հանրությանը կոչ է արվում գործուն միջոցներ ձեռնարկել հակամարտությունների գոտիներում լրատվամիջոցների աշխատակիցների անվտանգությունն ապահովելու համար, հայտնում է ՏԱՍՍ-ը:
Շեշտվում է, որ «2018 թվականի հունվարից հունիս 22 երկրում 66 լրագրող է սպանվել»: Սա գրեթե մեկ երրորդով ավելի է, քան անցյալ տարվա նույն ժամանակահատվածում, երբ զոհվել էր 50 մարդ:
Ինչպես նշում է Press Emblem Campaign-ը, մահվան դեպքերի ընդհանուր թվի կեսից ավելին 2018-ի հունվար-հունիսին բաժին է ընկել Աֆղանստանին (11 զոհ), Մեքսիկային (8), Սիրիային (7), ԱՄՆ-ին (6) եւ Եմենին (5): Կազմակերպությունը խորապես մտահոգված է նաեւ անցած 6 ամիսներին Հնդկաստանում 4 լրագրողների սպանության հետ կապված, որոնցից մեկին սպանել էին Քաշմիրում: Երեք թղթակից է սպանվել Բրազիլիայում, նույնքան՝ Էկվադորում եւ Ֆիլիպիններում: Եկուական՝ Գազայի հատվածում, Գվատեմալայում եւ Պակիստանում, մեկական՝ Բանգլադեշում, Կոլումբիայում, Հաիթիում, Ինդոնեզիայում, Իրաքում, Լիբերիայում, Նիկարագուայում, Ռուսաստանում, Սալվադորում եւ Սլովակիայում:
«Press Emblem Campaign-ը այս հարձակումները վճռականորեն դատապարտում է եւ կառավարություններին կոչ անում մեղավորներին պատասխանատվության ենթարկել»,- նշված է զեկույցում:
Press Emblem Campaign-ը, որը ստեղծվել է 2004 թվականին, ՄԱԿ-ին առընթեր խորհրդատվական կարգավիճակ ունի: Կազմակերպության կազմած վիճակագրությունում արտացոլված են իրենց մասնագիտական պարտականությունները կատարելիս լրագրողների սպանության դեպքերը: Տեղեկատվական աղբյուրներ են ծառայում մամուլի հրապարակումները, ՄԱԿ-ն եւ հասարակական կազմակերպությունները: