Մոսկվան տագնապահարույց նորություն է համարում բրիտանական Էյմսբերիում 2 մարդու հնարավոր թունավորման միջադեպը, հայտարարել է ՌԴ նախագահի մամուլի քարտուղար Դմիտրի Պեսկովը, փոխանցում է «ՌԻԱ Նովոստի»-ն:
«Անկասկած, դա խորը անհանգստություն է առաջացնում, նաեւ կապված համանման դրսեւորման հետ, ինչը Մեծ Բրիտանիայում մեկ անգամ չէ կատարվում»,- լրագրողներին ասել է Պեսկովը՝ ի պատասխան Էյմսբերիում տեղի ունեցած միջադեպը մեկնաբանելու խնդրանքի, որտեղ 2 տեղացիներ ծայրահեղ վիճակով հոսպիտալացվել են:
Նա նշել է, որ Կրեմլին հայտնի չեն բրիտանական իշխանությունների ինչ-որ ուղերձների մասին՝ Էյմսբերիում թունավորման միջադեպի հետաքննությանը օգնելու համար: «Ըստ էության, Սոլսբերիի իրավիճակի վերաբերյալ Ռուսաստանը համատեղ գործողություններ էր առաջարկել, որպեսզի լույս սփռվի դրա վրա, որ նպաստի այդ ոլորտում անվտանգության ամրապնդմանը, սակայն, ցավոք, այդ ուղերձները փոխադարձ չեղան»,- ասել է Պեսկովը:
Նրա խոսքով՝ Լոնդոնը «Սկրիպալների գործով» Ռուսաստանին ուղղած մերկապարանոց մեղադրանքների ոչ մի ապացույց այդպես էլ չի ներկայացրել:
Հիշեցնենք, որ մարտի 4-ին բրիտանական Սոլսբերիում, բրիտանական իշխանությունների պնդումներով, թունավորվել էին Մեծ Բրիտանիայի օգտին լրտեսության համար դատապարտված ՀԳՎ նախկին սպա Սերգեյ Սկրիպալը եւ նրա դուստր Յուլյան, ինչը միջազգային խոշոր սկանդալ էր հրահրել: Լոնդոնը կարծում է, որ А234 նյութով Սկրիպալի թունավորմանը մասնակցել է ռուսական պետությունը, Մոսկվան սա կտրականապես հերքում է: