Վրաստանը բաց չի թողնում Վերին Լարս անցակետի միջոցով Հայաստան վնասելու հնարավորությունը: Նման կարծիքը հուլիսի 5-ին լրագրողների հետ հանդիպման ժամանակ հայտնեց Հայաստանի Սպառողների միության նախագահ Արմեն Պողոսյանը:
Նրա խոսքով՝ Վրաստանում շատ լավ գիտեն, որ Հայաստանի համար Վերին Լարսը «թթվածնի» միակ աղբյուրն է, բաց չեն թողնում հայկական բեռնատարների անցումը բարդացնելու հնարավորությունը: «Ես չգիտեմ, թե որքանով, սակայն սա անշուշը բացասական ազդեցություն կունենա Հայաստանի տնտեսության վրա: Միշտ այդպես է եղել»,- ասաց նա:
ԶԼՄ-ների հաղորդումների համաձայն՝ Հայաստանից բեռնատար ավտոմեքենաներն արդեն մի քանի օր է կուտակվել են Վերին Լարս անցակետում եւ չեն կարողանում մուտք գործել Ռուսաստանի տարածք: Ավտոմեքենաները հիմնականում բեռնված են Հայաստանի գյուղատնտեսական արտադրանքով: Հայաստանի տրանսպորտի, կապի եւ տեղեկատվական տեխնոլոգիաների նախարարության մամուլի քարտուղար Անահիտ Առաքելյանը հայտարարություն է տարածել, ըստ որի, խնդիրը կապված է վրացական սահմանին մաքսային ընթացակարգերն անցնելու համար տոմսերի նոր էլեկտրոնային ամրագրման համակարգի (էլեկտրոնային հերթ) ներդրման հետ: