Մոտավոր գնահատականներով, 4 միլիոն բիթքոինը ընդմիշտ կորել է, իսկ 2 միլիոնը գողացել են օգտագործողների հաշիվներից: Այս մասին հաղորդել է CasaHODL-ի մասնագետ եւ BitGo էլեկտրոնային դրամապանակի նախկին առաջատար ինժեներ Ջեյմս Լոպը: Այս մասին նա ասել է հուլիսի 3-ից 4-ը Լիսաբոնում կայացած Building on-Bitcoin համաժողովի ժամանակ, գրում է ՌԲԿ-ն`հղում անելով CCN-ին:
Շրջանառության մեջ բիթքոինների ընդհանուր թվաքանակը վերականգնելու համար հարդֆորկ չեն անցկացնելու, ինչը նշանակում է, որ 21 մլն մետաղադրամների ընդհանուր էմիսիայում բիթքոինների 28,5 տոկոսն արդեն կորել է: BTC-ի առավելագույն քանակը չի գերազանցի 15 միլիոնը՝ չնայած այն հանգամանքին, որ ներկայումս դրանք ավելի քան 17 միլիոն են:
Հունիսի սկզբին Chainalysis վերլուծական գործակալությունը հաղորդել էր, որ 3.8 մլն մետաղադրամները տարբեր պատճառներով այլեւս չեն կարող օգտագործվել: Ընկերության ավագ տնտեսագետ Կիմ Գրայերը կարծում է, որ այժմ առաջին կրիպտոարժույթով վաճառքը ունի սպեկուլյատիվ բնույթ, ուստի դժվար է ասել, արդյոք կորսված բիթքոինների քանակը ազդում է դրանց արժեքի վրա:
«Մի կողմից, շուկայական կապիտալիզացիայի ուղիղ հաշվարկները ուշադրություն չեն դարձնում կորսված մետղադրամներին: Սակայն հաշվի առնելով այս ոլորտում չարաշահումների բարձր մակարդակը շուկայական կապիտալիզացիայի հաշվարկների փոփոխության դեպքում կարող է նոր տնտեսական մոդել առաջանալ, որը հաշվի է առնում շրջանառության մեջ բիթքոինների պակասուրդը— բացատրել է Գրայերը:
