Հայաստանի համար կարեւոր է պահպանել Ղարաբաղի հարցով բանակցային գործընթացի դինամիկան։ Այս մասին հայտնել է Հայաստանի ԱԳ նախարար Զոհրաբ Մնացականյանը «Շանթ» հեռուստաընկերությանը տված հարցազրույցում։
ԱԳ նախարարը հաստատել է, որ ադրբեջանցի գործընկերոջ հետ հանդիպումը ծրագրվում է մոտ ժամանակներս։
«Մեզ համար սկզբունքների հարց է։ Երբ որ մենք խոսում ենք խաղաղությանը նպաստող միջավայրի մասին, դա լայն կոնտեքստ ունեցող սկզբունք է, որի մեջ մտնում են նաեւ գործառույթներ, որոնք վերաբերում են զինադադարի ռեժիմի ուժեղացմանը։ Մեզ մոտ որեւէ բան այդ առումով չի փոխվել»,- նշել է նախարարը, մեկնաբանելով Կասպրշիկի խմբի ընդլայնման ու հրադադարի ռեժիմի պահպանման հսկողության վերաբերյալ պայմանավորվածություների իրականացման կարեւորության մասին հարցը։