Հայաստանը եղել եւ մնում է բանակցող կողմ: Այս մասին «Շանթ» հեռուստաընկերության հետ հարցազրույցում ասել է ՀՀ ԱԳ նախարար Զոհրաբ Մնացականյանը՝ խոսելով ղարաբաղյան հակամարտության մասին:
Հարցին՝ հունիսի 29-ին Բեռլինում մամուլի ասուլիսի ժամանակ դուք հայտարարել եք, որ հակամարտության հիմնական կողմը Լեռնային Ղարաբաղն է եւ պետք է վճռորոշ ձայն ունենա կարգավորման երկարաժամկետ ու մշտական գործընթացում, արդյոք նշանակո՞ւմ է, որ կան նաեւ ոչ հիմնական կողմեր, Մանացականյանը պատասխանել է, որ ասվածում ոչ մի նոր բան չկա, դա արտահայտված է կառավարության ծագրում, եւ դա եղել է մեր ընկալումն այս ամբողջ շրջանում:
«Ղարաբաղի խնդրի շուրջ են բանակցությունները, եւ հիմնական սուբյեկտն այստեղ Ղարաբաղն է։ Հարցը եղել է Ղարաբաղի մասին, հարցը եղել է Ղարաբաղի բնակչության մասին, Ղարաբաղի ժողովրդի մասին։ Մեզ համար հարցը եղել եւ մնում է նույնը․ 150 000 մարդկանց, որոնք ունեն իրենց անունները, իրենց ընտանիքները, իրենց տները, իրենց ֆիզիկական անվտանգության ապահովման երաշխավորման մասին է։ Սա է եղել միշտ հարցը։ Հիմնական կո՞ղմ է․ իհարկե, հիմնական կողմ է, որովհետեւ իրենց կյանքի մասին է խոսքը, իրենց անվտանգության մասին է խոսքը, ֆիզիկական անվտանգության մասին է, իրենք են եղել զինադադարը ստորագրող կողմ 1994 թվականին: Սա իրողություն է, որը միշտ եղել է»,- ասել է Մնացականյանը։
Հարցին՝ հետեւաբար Հայաստանը հիմանակա՞ն կողմ չէ, ԱԳ նախարարը պատասխանել է. «Հայաստանը եղել է բանակցող կողմ եւ մնում է բանակցող կողմ, մնում է հավատարիմ խիստ բանակցային գործընթացի միջոցով խաղաղ կարգավորման ապահովմանը։ Սա էլ է սկզբունք, որը հստակորեն դրված է նաեւ Կառավարության ծրագրի մեջ, եւ Հայաստանն իր այդ գործառույթը հստակորեն կատարել է, շարունակում է կատարել եւ մնում է հավատարիմ այդ գործառույթը կատարելու հարցում»: