Ուկրաինայում երկու ամսվա մեջ երկրորդ անգամ արտաքսել են «Դաթո Աղժաբեդինսկի» մականունով «օրենքով գողին»: ՈՒՆԻԱՆ-ը հաղորդում է, որ հուլիսի 6-ին Ուկրաինայի ազգային ոստիկանությունը բացահայտել եւ ձերբակալել է այսպես կոչված «օրենքով գողին»՝ 43-ամյա օտարերկրացուն, որը քրեական շրջանակներում հայտնի է «Դաթո Աղժաբեդինսկի» մականունով:
Ուկրաինայի տարածք մուտք գործելու արգելքը խախտած հանցագործ խմբի ղեկավարին, իրավապահները ձերբակալել են Տրուսկավցեում եւ տեղափոխել Լվովում գտնվող Միգրացիոն ծառայության Գլխավոր վարչություն: Վարչությունում նրա դեմ կազմվել են համապատասխան փաստաթղթեր, մասնավորապես վարչական իրավախախտման վերաբերյալ արձանագրությունը, որից հետո ոստիկանությունը նրան ստիպողաբար արտաքսել է:
Երկու ամիս առաջ այս «օրենքով գողը», որը բազմիցս դատապարտվել է լուրջ հանցագործությունների համար, ձերբակալվել էր Կիեւի շրջանի իրավապահ մարմինների կողմից եւ արտաքսվել Ուկրաինայից:
