ՊՆ-ում բուժծառայության գերակա խնդիրը զինծառայողների առողջության պահպանումն է, սանիտարահիգիենիկ իրավիճակի կարգավորումը եւ մարտական դիրքերում եւ զորանոցներում: Այս մասին այսօր՝ հուլիսի 9-ին, կենտրոնական հավաքակայանում լրագրողների հետ զրույցում նշել է ՊՆ ռազմաբժշկական վարչության պետ, բուժծառայության փոխգնդապետ Գայանե Հովհաննիսյանը:
Նրա խոսքով, վերջին տարիներին իրենք ավելի շատ ուշադրություն են դարձնում առողջական խնդիրների կանխարգելիչ աշխատանքներին. «Վերջին տարիներին պատվաստումների ծրագրում պարտադիր ավելացրել ենք նաեւ գրիպի պատվաստումը, որի արդյունքում ունենք դրական արդյունքներ: Այսինքն բուժումից անցել ենք որոշ ինֆեկցիոն հիվանդությունների կանխարգելմանն ու կառավարմանը: Վերջին ժամանակներին սեզոնային գրիպի բռնկումների ժամանակ ավելի քիչ բարդություններ ունենք եւ դրանք նվազագույնի են հասնում»,-ասաց Գայանե Հովհաննիսյանը:
Դիտարկմանը, որ հաճախ առողջական խնդիրներ երիտասարդներ հայտնվում են բանակում, ավելին, դիրքերում, նա արձագանքեց. «Արդեն սկսած հավաքակայանից գործում է մեր բժշկական հանձնաժողովը, որն առաջին օրվանից ուսումնասիրում է զինծառայողների անձնական գործերը: Բացի դրանից արտաքին զննում են կատարում, հարկ եղած դեպքում՝ առանձնացնում են այն դեպքերը, որոնք սուր են: Այս օրերին արդեն մի քանի դեպք գրանցվել է. սուր աղիքային դեպք կարող է լինել, կամ ջերմության բարձրացման դեպքեր, որոնք անպայման հետազոտվում են Կենտրոնական զինվորական հոսպիտալում, անհրաժեշտության դեպքում՝ բուժվում են, որից հետո ուղարկվում են զորամասեր»:
Նա կոչ արեց իրենց հանձնաժողովի աշխատանքը չշփոթել փորձաքննության հետ. «Այսինքն մենք այստեղ փորձաքննությունից հետո ստեղծված իրավիճակն ենք քննում: Այնուհետեւ ուղարկում են ըստ ծառայության վայրերի: Ամբողջ ծառայության ընթացքում զինվորները գտնվում են մեր ուշադրության կենտրոնում: Կանխարգելիչ միջոցառումներից բացի, նաեւ ծնողների ահազանգերից, բողոքների հիման վրա իրականացնում ենք տվյալ զինծառայողների առողջության հետազոտություններ, հարկ եղած դեպքում՝ նաեւ բուժում:
Առաջնային բուժօգնությունը կազմակերպվում է զորամասի բուժկետում եւ մինչեւ 7 օր կարող ենք բուժումն իրականացնել այդ բուժկետերում: Եթե վիճակի վատացում է գնում կամ կասկածներ է լինում, որ վիճակը կարող է վատանալ, տեղափոխվում է կայազորային հոսպիտակ, այնուհետեւ եթե կարիքը կա՝ կենկտորանական զինվորական հոսպիտալ»:
Դիտարկմանը, որ բուժօգնության դիմող զինծառայողներին բոլորին նույն դեղամիջոցն են տալիս, Հովհաննիսյանը նկատեց, որ շատ հաճախ դրանք ստուգված տեղեկություններ չեն. «Ամեն ինչ արվում է, որ մեր զինծառայողները իրենց ծառայությունը կատարեն պատշաճ»:
Հարցին՝ համոզվա՞ծ է, որ զինծառայությունից ազատման ենթակա հիվանդություններից որեւէ մեկով հիվանդ զորակոչիկներ չի հայտնվի բանակում, Գայանե Հովհաննիսյանն արձագանքեց. «Իհարկե համոզված եմ, արդեն փորձաքննված են գալիս, իսկ մեր հանձնաժողովը ֆիլտրի դեր է կատարում:
Կառավարության որոշումով փորձաքննության կարգը փոխվել է, դրական կողմերից մեկն էլ այն է, որ փորձաքննությունից հետո թերթիկում նշվելու է սահմանափակումները: Այսինքն զինծառայողը տեղյակ է լինելու, թե ինչ խնդիր ունի եւ ինչ սահմանափակում է իրեն սպասվում»: