ԱՄՆ նախագահ Դոնալդ Թրամփը ՆԱՏՕ-ի գագաթնաժողովին մեկնելուց առաջ հերթական անգամ ՆԱՏՕ-ի երկրներին կոչ է արել մեծացնել պաշտպանական ծախսերը, փոխանցում է «ՌԻԱ Նովոստի»-ն:
«ՆԱՏՕ-ի երկրները պետք է ավելի շատ վճարեն, ԱՄՆ-ն պետք է ավելի քիչ վճարի: Շատ անարդարացի է»,- նշել է Թրամփն իր Twitter-ում:
Թրամփը կմասնակցի Բրյուսելում հուլիսի 11-12-ին տեղի ունենալիք Հյուսիսատլանտյան դաշինքի գագաթնաժողովին:
«Պատրաստվում եմ Եվրոպա ուղեւորությանը: Առաջին հանդիպմանը ՆԱՏՕ-ում: ԱՄՆ-ն չափից ավելի շատ է ծախսում, քան ցանկացած այլ երկիր, որ նրանց պաշտպանի: Սա անարդարացի է ամերիկացի հարկատուների նկատմամբ: Դրանից բացի, մենք 151 մլրդ դոլար կորցնում ենք Եվրամիության հետ առեւտրի մեջ: ԵՄ երկրները մեզնից մեծ մաքսատուրքեր են պահում»,- նշել է ԱՄՆ նախագահը Twitter-ում:
Թրամփը քանիցս դաշինքի գործընկերներին կոչ է արել կատարել Բուխարեստում ձեռք բերած համաձայնությունները պաշտպանական ծախսերը մինչեւ ՀՆԱ 2 տոկոս բարձրացնելու մասին՝ սպառնալով, որ հակառակ դեպքում կկրճատի ԱՄՆ մասնակցությունը ՆԱՏՕ-ի անդամ երկրների անվտանգության ապահովման ընդհանուր ծրագրերին:
