Հայկական 5G տեխնոլոգիաները պահանջված են արտասահմանում։ Այս մասին NEWS.am-ի թղթակցի հետ զրույցում նշել է National Instruments AM ընկերության ինժեներ Հրայր Հովսեփյանը հուլիսի 7-ին՝ Վանաձորի տեխնոլոգիական կենտրոնում կազմակերպված Երկրորդ ինժեներական ցուցահանդես-ֆորումի ժամանակ։ Այս ցուցահանդեսին National Instruments AM ընկերությունը ներկայացրել է 5G համակարգի բազային կայանի նախատիպը եւ ընդունիչը, որը մշակվել է հայկական YEA Engineering ընկերության հետ համատեղ։
«Համակարգի բաղադրիչները ստանդարտ են, բայց նրա ամբողջ ճարտարապետությունը, ինչպես ծրագրային ապահովման մեծ մասը նախագծվել է Հայաստանում եւ ապահովում է տվյալների փոխանցումը մինչեւ 2,8 ԳԲ/Վ արագությամբ»,-նշել է Հրայր Հովսեփյանը։
Նրա խոսքով, նախորդ տարի ներկայացված National Instruments AM-ի եւ YEA Engineeringժի համատեղ մշակումը այս պահին սերտիֆիկացում է անցնում։
Հարցին՝ ե՞րբ Հայաստանում կապահովվի 5G ծածկույթը, National Instruments AM ընկերության ինժեներ նշել է, որ երբ օպերատորները դա ցանկանան։
Հարցին՝ որքանո՞վ են հայ մասնագետների կողմից նախագծված 5G տեխնոլոգիաները պահանջված արտասահմանում, նա պատասխանել է, որ մեկ ամսում ընկերությունը միջինում կատարում է 2-3 պատվեր։
«Հիմնականում պատվերները ստացվում են համալսարաններից, ինչպես նաեւ Ռումինիայի, Միացյալ Արաբական Էմիրությունների, Ամերիկայի օպերատորներից եւ արդյունաբերական ընկերություններից»,-եզրափակել է Հովսեփյանը։