Ճիշտ որոշում կայացրեց Տարոն Մարգարյանը, քանի որ Հանրապետականի թիմը պարտվել էի, ինքն էլ պետք է հեռանար: Այս մասին այսօր՝ հուլիսի 11-ին, լրագրողների հետ զրույցում ասաց ԱԺ «Ծառուկյան» խմբակցության պատգամավոր Նաիրա Զոհրաբյանը՝ անդրադառնալով քաղաքապետ Տարոն Մարգարյանի հրաժարականին:
«Տարոն Մարգարյանի քաղաքական թիմը հեռացել էր իշխանությունից, եւ կարծես թե վերջին բաստիլը մնացել էր քաղաքապետարանը: Կարծում եմ՝ ճիշտ որոշում կայացվեց ներկայացնելու հրաժարական, որովհետեւ նոր Հայաստանում մենք պետք է նոր էջից սկսենք, այդ թիմը պարտվել էր եւ Հանրապետականի թիմը ամբողջապես պետք է հեռանար»,- ասաց պատգամավորը:
ԱԺ «Ծառուկյան» խմբակցության պատգամավոր Վահե Էնֆիաջյանն էլ հավելեց, որ ՀՀԿ-ին եւ նրա ներկայացուցիչներին ժողովուրդն իր վերաբերմունքը հայտնել է, եւ իր կարծիքով, քաղաքական եւ բարոյական առումով ճիշտ է, որ պատասխանատու պաշտոններ զբաղեցնողները իրենց քաղաքական թիմի հետ հեռանան:
Նաիրա Զոհրաբյանն էլ հավելեց, որ ԲՀԿ-ն արդեն քաղաքական որոշում է կայացրել՝մասնակցելու Երեւանի ավագանու ընտրություններին:
«Ես կարծում եմ՝ ընտրությունները կլինեն արտահերթ, ով կգլխավորի ԲՀԿ համամասնական ցուցակը, առաջիկա օրերի քննարկումների արդյունքում պարզ կլինի»,-ասաց պատգամավորը:
Նշենք, որ Երեւանի քաղաքապետ Տարոն Մարգարյանը հրաժարական է տվել հուլիսի 9-ին: Նա Երեւանի քաղաքապետի պաշտոնը զբաղեցրել է 2011 թվականի նոյեմբերի 15-ից՝ ընտրվելով Երեւան քաղաքի ավագանու կողմից՝ փոխարինելով հրաժարական տված Կարեն Կարապետյանին: