ԵՄ-ի «Ստեղծագործ Եվրոպա» ծրագիրը Եվրոպայի ամենամեծ ֆինանսավորմամբ իրագործվող ծրագրերից է, որին միանում է Հայաստանը: Այս մասին, այսօր՝ հուլիսի 11-ին, «Հայաստանի Հանրապետության կառավարության եւ Եվրոպական հանձնաժողովի միջեւ մշակութային եւ ստեղծագործ ոլորտների համար Միության «Ստեղծագործ Եվրոպա» ծրագրին Հայաստանի Հանրապետության մասնակցության վերաբերյալ» փոխըմբռնման հուշագիրը վավերացնելու մասին» փաստաթուղթը ներկայացնելիս նշեց Մշակույթի փոխնախարար Նազենի Ղարիբյանը:
Նրա խոսքով, միայն մշակույթ բաղադրիչի կիրառման համար նախատեսվում է 454, 8 միլիոն եվրոյի դրամանշնորհ տրամադրել մշակույթի ոլորտի ակտիվ հասարակական կազմակերպություններին:
«Ստեղծագործ Եվրոպա» ծրագրի շրջանակային նախագիծը մեկնարկել է 2014 թ., «որը բաղկացած է երկու՝ «Մեդիա» եւ «Մշակույթ» բաղադրիչներից, այն պետք է իրականացվի 2014-2020 թթ. ընթացքում: Ներկայում նախագիծը ԵՄ մշակույթի ոլորտի ամենամեծ ֆինանսավորմամբ իրականացվող ծրագրերից է (միայն «Մշակույթ» բաղադրիչի կիրարկման համար 2014-2020 թթ. նախատեսվում է 454.8 մլն եվրոյի դրամաշնորհ տրամադրել մշակույթի ոլորտի առավել ակտիվ հասարակական կազմակերպություն-ներին եւ հրատարակչական ոլորտում մասնագիտացած կազմակերպություններին):
Նշյալ ծրագիրը հասանելի է ԵՄ անդամ երկրներին, այդ թվում՝ Իսլանդիային, Նորվեգիային, Մոլդովային եւ Վրաստանին։
Ծրագրի ֆինանսական պարտավորությունը՝ «Մշակույթ» բաղադրիչին միանալու դեպքում, կազմում է 52 հազար եվրո:
Միանալով «Ստեղծագործ Եվրոպա» շրջանակային նախագծի «Մշակույթ» բաղադրիչին՝ հայաստանյան մշակութային ոլորտի կազմակերպությունները հնարավորություն կունենան ակտիվորեն ներգրավվելու եվրոինտեգրման գործընթացին, իրականացնելու դրամաշնորհային ծրագրեր գրականության, թատրոնի, ճարտարապետության, կերպարվեստի եւ կինոարտադրության ոլորտներում:
«Եվրոպական հանձնաժողովի եւ Հայաստանի Հանրապետության կառավարու-թյան միջեւ «Ստեղծագործ Եվրոպա»-ին՝ Միության մշակութային եւ ստեղծագործ ոլորտների համար նախատեսված ծրագրին Հայաստանի Հանրապետության մասնակցության վերաբերյալ» փոխըմբռնման հուշագիրը ստորագրվել է 2018 թ. մարտի 20-ին Արմեն Ամիրյանի Բրյուսել կատարած այցի ժամանակ:
ԵՄ կողմից փաստաթուղթը ստորագրել է Կրթության, երիտասարդության, սպորտի եւ մշակույթի, հարցերով եվրոպական հանձնակատար Թիբոր Նավարաչիչը:
Հայաստանի Հանրապետության Կառավարության եւ Եվրոպական հանձնաժողովի միջեւ՝ մշակութային եւ ստեղծագործ ոլորտների համար Միության «Ստեղծագործ Եվրոպա» ծրագրին Հայաստանի Հանրապետության մասնակցության վերաբերյալ փոխըմբռնման հուշագրի 5-րդ հոդվածի համաձայն, այն ուժի մեջ կմտնի գրավոր ծանուցում ստանալու օրվանից, որով Հայաստանը Հանձնաժողովին դիվանագիտական ուղիներով կծանուցի, որ դրա ուժի մեջ մտնելու համար իր ներպետական իրավական ընթացակարգերն ավարտվել են:
«Ստեղծագործ Եվրոպա» ծրագրի 2018թ. Նախաձեռնություններին մասնակցելու համար անհրաժեշտ է Հուշագրի ուժի մեջ մտնելու գործընթացներն ավարտել մինչեւ ս.թ. հուլիսի վերջին շաբաթը:
