Իսրայելը դեմ չէ Սիրիայի նախագահ Բաշար Ասադի՝ Սիրիայի նկատմամաբ վերահսկողության վերականգնմանը եւ կշարունակի հարեւան երկրում հակամարտությանը չմիջամտելու քաղաքականությունը, Իսրայելի կառավարության ղեկավար Բենիամին Նեթանյահուին մեջբերում է Haaretz թերթը, փոխանցում է «ՌԻԱ Նովոստի»-ն:
Ռուսաստան կատարած այցի ավարտին Իսրայելի վարչապետը շփվել է իրեն ուղեկցող լրագրողների հետ: Այցի հիմնական թեմաներից մեկը Սիրիայի խնդիրն էր, այդ թվում՝ կառավարական զորքերի հարձակումն Իսրայելի հետ սահմանին գտնվող շրջաններ:
«Մենք Ասադի ռեժիմի հետ որեւէ խնդիր չենք ունեցել: 40 տարվա ընթացքում ոչ մի փամփուշտ չի արձակվել Գոլանի բարձունքներում... Ես հստակ քաղաքականություն եմ սահամնել՝ մենք չենք միջամտում, եւ մենք չենք միջամտել: Սա չի փոխվել»,- ասել է Նեթանյահուն:
Նա հավելել է, որ Իսրայելը կպաշտպանի իր սահմանների անձեռնմխելիությունն ուժի կիրառմամբ, այդ թվում նաեւ՝ սիրիական բանակի դեմ: Անցյալ գիշեր իսրայելցի զինվորականները Քունեյթրա սահմանային գավառում երեք բանակային դիրք է գնդակոծել՝ ի պատասխան Սիրիայի հետախուզական անօդաչուների ներխուժմանն իր օդային տարածք:
