Ճապոնիայի հարավարեւմտյան եւ կենտրոնական շրջաններում ջրհեղեղի հետեւանքով զոհերի թիվը հասել է մինչեւ 204-ի: Այս մասին հայտնել է երկրի կառավարության գլխավոր քարտուղար Յոսիհիդե Սուգան, փոխանցում է «ՌԻԱ Նովոստ»-ն:
Նա հավելել է, որ պաշտոնապես անհետ կորած է համարվում 28 քաղաքացի, չի հաջողվում հաստատել եւս 54-ի գտնվելու վայրն ու անվտանգությունը:
Ավելի վաղ հաղորդվել էր 200 զոհվածի մասին: Ուրբաթ Ճապոնիայի կառավարությունը որոշել է 10 պրեֆեկտուրաների (Ճապոնիայում ընդհանուր 47 պրեֆեկտուրա կա) տուժած 58 բնակավայրերին 35 մլրդ իենի (մոտ 350 մլն դոլար) սուբսիդիաներ հատկացնել:
Հիմա աղետըի գոտում աշխատում են ինքնապաշտպանության ուժերի, ոստիկանության եւ հրշեջ պահպանության (Ճապոնիայում նրա վրա են դրված նաեւ փրկարար ծառայության գործառույթները) 73 հազար աշխատակիցներ, ինչպես նաեւ 5,5 հազար կամավորներ:
Տուժած շրջաններում ավելի քան 5 հազար մարդ գտնվում է տարհանման կետերում: Առանց ջրի են մնում ավելի քան 200 հազար տնտեսություններ: