Հայաստանը պետք է կենտրոնանա ՏՏ արտադրանքի մշակման ուղղությամբ: NEWS.am-ի թղթակցի հետ զրույցում նման տեսակետ հայտնեց ՀՀ տրանսպորտի, կապի ու տեղեկատվական տեխնոլոգիաների նախարարի առաջին տեղակալ Հակոբ Արշակյանը։
Նրա խոսքով՝ ռազմավարական տեսանկյունից ՏՏ արտադրանքի բիզնեսը մեկ աստիճան ավելի բարձր է, քան բիզնեսին ՏՏ ծառայությունների մատուցումը։
«Մինչդեռ Հայաստանը, լինելով ավելի ուժեղ մաթեմատիկական ալգորիթմներում, բարդ սարքավորումների ու ծրագրային ապահովման (ԾԱ) նախագծման բնագավառներում, ավելի ակտիվ է ՏՏ ծառայությունների մատուցման մասով, որտեղ մեր երկրի առավելությունները մեծ չեն. շատ բարդ է մրցակցել հնդիկների, չինացիների ու ֆիլիպինցիների հետ»,- նշեց փոխնախարարը։
Նա կարծում է, որ պետք է հստակ ուղենիշերի հետեւել՝ արհեստական ինտելեկտ, որի բնագավառում գիտելիքներն աշխարհում բարձր են գնահատվում, 5G ինդուստրիա՝ գլոբալ թրենդային ուղղություն աշխարհում, որը Հայաստանում ունի բարձր ներուժ թե՛ սարքավորումների փորձարկման, թե՛ հաղորդակցության համակարգի դիզայնի առումով, ինչպես նաեւ ինքնավար մեքենաների և բլոկչեյն տեխնոլոգիաների, որոնք նույնպես թանկ են եւ եզակի գիտելիքներ են պահանջում։
«Մենք քիչ ինժեներներ ունենք, բայց բոլորը շատ խելացի են, փորձառու եւ դինամիկ, եւ պետք է դրա վրա շեշտադրում անել։ Մենք ուզում ենք ստեղծել մի միջավայր, որտեղ գիտելիքները կկենտրոնանան հայկական ՏՏ արտադրանքի վրա՝ թե սարքավորումների, թե ԾԱ-ի»,- նշեց Հակոբ Արշակյանը։
Նա նկատեց, որ Հայաստանում ՏՏ մշակումների գերակա մասը արտասահմանի համար է արվում։
