Թիֆլիսում իր տան մոտ դաժանաբար սպանվել է 22 ամյա Գեւորգ Սարգսյանը:
Սպանությունը իրագործել է 15 հոգուց բաղկացած խումբը, որը 22 դանակի հարված է հասցրել երիտասարդին։ Գեւորգ Սարգսյանը մահացել է հիվանդանոց տեղափոխվելու ճանապարհին։ Այս մասին հաղորդում է rustavi 2 հեռուստաընկերությունը։
Գեւորգ Սարգսյանի ընտանիքի անդամները չգիտեն սպանության պատճառը, սակայն նրանք չեն բացառում, որ հարձակումը կապված լինի մի քանի ամիս առաջ տեղի ունեցած ընդհարման հետ։
Առկա են տեսախցիկների արձանագրությունները, որտեղ երեւում է, թե ինչպես երկու մեքենայով մի խումբ մարդիկ գալիս են Գեւորգ Սարգսյանի տան մոտ եւ սպասում նրան։ Հարեւանները նրանց տեսել են, սակայն չեն ճանաչում։ Սարգսյանի ընտանիքի անդամները կասկածներ ունեն, որ նրանք հետապնդել են իրենց որդուն։
Հեռուստաընկերության լրագրողի տեղեկություններով դեպքի առիթով դեռեւս ձերբակալվածներ չկան։ Միայն հայտնի է, որ նշանակվել է դիակի դատաբժշկական փորձաքննություն։