Ճանապարհային ոստիկանության Երեւանը սպասարկող գումարտակն անցած 10 օրում իրականացրել է ճանապարհային երթեւեկության անվտանգության ապահովման ուղղությամբ շուրջօրյա ծանրաբեռնված ծառայություն:
Ոստիկանությունից NEWS.am-ին հայտնում են, որ հուլիսի 2-ից 12-ը, ճանապարհային ոստիկանները կազմել են վարչական իրավախախտման վերաբերյալ 985 արձանագրություն, պահպանվող հատուկ տարածք է տեղափոխվել 182 տրանսպորտային միջոց: Դրանցից 38-ի վարորդները եղել են ոչ սթափ վիճակում:
Ճանապարհային ոստիկանության ավտոքարշակը, չթույլատրված վայրերում կայանելու համար, պահպանվող հատուկ տարածք է տեղափոխել 128 մեքենա:
Բացի այս, հայտնաբերվել են այլ վարորդների նկատմամբ անհարգալից վերաբերմունք դրսեւորող եւ միտումնավոր խախտումներ կատարող վարորդներ, հատուկ եւ գերհզոր ձայնազդանշանային համակարգեր ունեցող, առանց համարանիշի կամ որեւէ առարկայով այն փակված մեքենաներ:
Ճանապարհային ոստիկանների ուշադրության կենտրոնում են եղել նաեւ բարձր ձայնով երթեւեկելու համար վերասաքավորած խլացուցիչներով մեքենաների վարորդները, նաեւ գերհզոր ձայնով երթեւեկող մոտոցիկլետները: Բացատրական աշխատանք է իրականացվել նաեւ հետոիտների շրջանում: Նրանք հիմնականում զգուշացվել են:
Մայրաքաղաքում ծառայություն իրականացնող ճանապարհային ոստիկանության առաջին սպայական գումարտակի կարգախմբերը, բացի զորակոչին կամ այլ զանգվածային միջոցառումներին իրականացրած ծառայություններից, օրը 3 անգամ, պիկ ժամերին, հատուկ ծառայություն են կատարել բանուկ խաչմերուկներում՝ կանոնակարգելով երթեւեկությունը:
Ներկայացվածը միայն Երեւանը սպասարկող գումարտակի ու միայն վերջին 10 օրերի ծառայության մասին էր: Նույն ծանրաբեռնվածությամբ ճանապարհային ոստիկանները ծառայություն են իրականացրել նաեւ մարզերում:
Եվս մեկ անգամ հորդորում ենք բոլոր վարորդներին՝ պահպանել երթեւեկության կանոնները: Ճանապարհային ոստիկանությունը խախտումներ կատարող վարորդներին հայտնաբերելու հարցում հետեւողական է: