Ճապոնիայի հարավ-արեւմտյան եւ կենտրոնական մասերում հորդառատ անձրեւների հետեւանքով առաջացած ջրհեղեղներից վնասը գնահատվում է 43.69 մլրդ իեն (գրեթե 389 մլն դոլար): Այս մասին հաղորդում է Kommersant.ru կայքը՝ վկայակոչելով Ճապոնիայի գյուղատնտեսության նախարարության տվյալները: Գերատեսչությունը շեշտում է, որ աղետի հետեւանքով տուժել են գյուղատնտեսական հողերը, ձկնորսական տնտեսություններն ու ենթակառուցվածքը:
Ճապոնիայի 47 պրեֆեկտուրաներից 31-ի 160 տուն ամբողջությամբ ոչնչացվել է ջրհեղեղների եւ սողանքների հետեւանքով, 700-ը լուրջ վնասվել է, ավելի քան 25 հազար տուն ջրով է լցվել: Ճապոնիայի որոշ շրջաններում մի քանի օրում ավելի քան մեկ մետր տեղումներ են գրանցվել: Առնվազն 216 մարդ է մահացել, մի քանի տասնյակ մարդ անհայտ կորած է համարվում: Տարհանման հատուկ կենտրոններում գրեթե 6 հազար մարդ է գտնվում: