Երկուշաբթի Պեկինում Եվրոպական խորհրդի նախագահ Դոնալդ Տուսկը Ռուսաստանին, ԱՄՆ-ին եւ Չինաստանին կոչ է արել սկսել Առեւտրի համաշխարհային կազմակերպության արագ բարեփոխումը, չոչնչացնել համաշխարհային կարգը եւ առեւտրային պատերազմներ չսկսել, փոխանցում է «ՌԻԱ Նովոստի»-ն:
«Ես մեր չինացի գործընկերներին կոչ եմ անում, սակայն նաեւ ԱՄՆ ու Ռուսաստանի նախագահներ Դոնալդ Թրամփին ու Վլադիմիր Պուտինին համատեղ սկսել ԱՀԿ բարեփոխման գործընթացը»,- հայտարարել է Տուսկը Չինաստանի Պետխորհրդի նախագահ Լի Կեցյանի եւ ԵՀ ղեկավար Ժան-Կլոդ Յունկերի հետ համատեղ մամուլի ասուլիսում:
Նա շեշտել է, թե «մեր ընդհանուր պատասխանատվությունն է, Եվրոպայի, Չինաստանի, ԱՄՆ եւ Ռուսաստանի պատասխանատվությունը՝ չոչնչացնել ստեղծված կարգը, բարելավել այն, չսկսել առեւտրային պատերազմներ, որոնք մեր պատմության մեջ ավելի հաճախ թեժ կոնֆլիկտների են հանգեցրել»:
«Աշխարհի ճարտարապետությունը փոխվում է մեր աչքերի առաջ, եւ մեր ընդհանուր պատասխանատվությունն է այդ փոփոխությունները լավագույն ուղղությամբ կատարել: Աշխարհը կառուցվել է տասնամյակների ընթացքում, երբեմն տարաձայնությունների ճանապարհով, սակայն այդ գործընթացի արդյունքում Եվրոպայում խաղաղություն հաստատվեց, Չինաստանը զարգացում ստացավ, իսկ Արեւմուտքի եւ Արեւելքի միջեւ սառը պատերազմն ավարտվեց»,- հայտարարել է Տուսկը:
