Համաշխարհային հանրությունը դեռեւս ժամանակ ունի, որպեսզի կանխի քաոսն ու կենֆլիկտը, հենց այս պատճառով անհրաժեշտ է հարգել ու պահպանել ընդհանուր կանոնները եւ յուրաքանչյուրի վրա դրված պարտավորությունները: Այս մասին երկուշաբթի մամուլի ասուլիսի ժամանակ հայտարարել է Եվրոպական խորհրդի նախագահ Դոնալդ Տուսկը, փոխանցում է «ՌԻԱ Նովոստի»-ն:
«Դեռեւս ժամանակ կա կոնֆլիկտներն ու քաոսը կանխելու համար, այսօր մեր առջեւ դիլեմա է ծառացած՝ դաժան խաղե՞ր խաղալ, ինչպիսին են «մաքսատուրքերի պատերազմները» եւ Ուկրաինայում ու Սիրիայում հակամարտությունները, թե՞ ընդհանուր որոշումներ փնտրել՝ հիմնված արդարացի կանոնների վրա»,- հայտարարել է Տուսկը ԵՄ-Չինաստան գագաթնաժողովի շրջանակում նիստից հետո կայացած մամուլի ասուլիսում:
Նրա խոսքով՝ «մեր օրերում հենց այս պատճառով են այդքան կարեւոր պատասխանատվությունը, կանխատեսելիությունը, համագործակցության ոգին եւ ընդհանուր կանոնների ու պարտավորությունների հանդեպ հարգանքը»: