ՀՀ տրանսպորտի, կապի եւ տեղեկատվական տեխնոլոգիաների նախարար Աշոտ Հակոբյանն ընդունեց Հայաստանի Հանրապետությունում Իրանի Իսլամական Հանրապետության արտակարգ եւ լիազոր դեսպան Սեյեդ Քազեմ Սաջադիին։
Նախարարությունից NEWS.am-ին հայտնում են, որ ողջունելով դեսպանին՝ նախարարը նշեց, որ տրանսպորտի, կապի եւ բարձր տեխնոլոգիաների ոլորտներում երկու երկրների միջեւ արդյունավետ համագործակցություն է ձեւավորվել։ Հատկապես ուղեւորափոխադրումների եւ բեռնափոխադրումների ոլորտում գործակցությունը տարեցտարի ավելի է ընդլայնվում։
Նախարար Աշոտ Հակոբյանն անդրադարձավ մուլտիմոդալ բեռնափոխադրումների ծավալների մեծացման հնարավորություններին՝ նշելով, որ ձեւավորված դրական փորձը գոհացուցիչ է, եւ բոլոր հնարավորությունները պետք է օգտագործել այն ավելի մեծացնելու համար։
Դեսպան Սեյեդ Քազեմ Սաջադին, շնորհավորելով նախարարին պաշտոնում նշանակվելու կապակցությամբ, նշեց, որ Իրանի եւ Հայաստանի միջեւ տնտեսական կապերի ամրապնդումն ու խորացումը շահավետ են երկու երկրների համար էլ։ Հանդիպման ընթացքում կարեւորվեց Հյուսիս-հարավ մայրուղու շինարարությունը։ Նշվեց, որ այն, որպես տարանցիկ ուղի, առանցքային նշանակություն ունի ոչ միայն Հայաստանի, այլեւ հարեւան երկրի տնտեսության՝ մասնավորապես տրանսպորտի եւ զբոսաշրջության զարգացման համար։
Քննարկվեցին նաեւ ճանապարհաշինության, երկաթուղու, ուղեւորափոխադրումների եւ բեռնափոխադրումների, կապի ոլորտներում համագործակցության ընդլայնմանն ուղղված մի շարք հարցեր։